Ni Russel Fullozos
PIO Reporter
CEBU CITY (Sept. 28, 2022) — Makatilaw na unya og libreng internet ang matag barangay dinhi sa dakbayan.
Kini ang gitataw ni Richter Castañares sa Management Information & Computer Services (MICS), nga nitaho nga nailhan na nila ang mga lugar nga maoy kabutangan sa wifi.
“Na-identify na nato ang mga areas nga butangan, pareha sa barangay hall, parks, ug schools,” pulong niya.
Aron makapahimulos ang tanan, matag usa adunay usa ka oras nga libring wifi matag adlaw.
Pulong niya, gibana-bana nga sa pasiunang hugna adunay 50 ka mga barangay ang mataoran dayon karong Oktubre hain unahon ang mga ani-a sa ubos nga bahin sa dakbayan.
Isunod lang sab unya dayon ang sa bukirang mga barangay.
Na-identify na nato ang mga areas nga butangan, pareha sa barangay hall, parks, ug schools.
Richter Castañares sa Management Information & Computer Services (MICS)
Kagahapon, gipahigayon na ang bidding alang sa proyekto, nga nga mobalor sa P8 milyones hain P100,000 ang igahin igahin sa matag barangay sulod sa 12 ka buwan isip bayad.
Ang proyekto kabahin sa gi-target ni Mayor Mike Rama nga makab-ot sulod sa unang 100 ka mga adlaw sa iyang termino. #
Cebu City • News & Information 