Ni Rey Pasaporte
PIO Reporter

Mayor Mike Rama. (PIO/Allan Defensor)

CITY HALL, Cebu City (Sept. 19, 2022) — Gitahasan ni Mayor Mike Rama si Konsehal Edgardo “Jaypee”Labella II nga maoy mangulo sa pagpalihok sa mga grupo sa fraternity dinhi sa dakbayan alang sa pagtangtang sa mga graffiti tibuok dakbayan.

Ang graffiti mga gisuwat, gipintura o gidibuho sa bongdong o kural nga sementado nga makita sa pampublikong lugar nga gihimo nga walay pagtugot.

“Jaypee Labella, I wish you continue to focus, I already talked to Akrho…you take charge in cleaning the city of Cebu…of graffiti. Please show me your mettle Jaypee Labella,” hagit sa mayor.

“Mag-Singapore-like ta Cebu City ‘nya puno ta graffiti.  Maayo, dili? Dili!” dugang niya nganong gisangonan niya sa maong trabaho ang konsehal.

Councilor Jaypee Labella (PIO/ File)

Sa laing bahin, subli sab nga gigipahibawo ni Mayor Rama nga mopagawas unya siya og executive order nga magpatuman sa “disiplina” kabahin sa tukmang paghipos sa basura ilabi na sa mga panimalay.

Iyang giawhag ang tanang mga kawani sa City Hall nga manglimpiyo gyud sa ilang tugkaran ug sa balay mismo, kay sa panimalay man magsugod ang pagtampo sa usa’g usa sa tinguha nga mahisusama sa nasud sa Singapore ang atong dakbayan.

“Kinahanglan gikan gyud sa household because my wife…gave me a profound answer when I was asking a group on how do we reach a Singapore-like Cebu City…. She’s the only one who made that statement that a Singapore-like Cebu City starts at home,” ingon sa mayor.

“It cannot be starting at City Hall. It should start at your own household,” dugang niya. #