Halfway house nga tinabangan sa dakbayan duha ka tuig na

Ni Russel Fullozos 
PIO Reporter

BANILAD, Cebu City (September 19, 2022) — Duha na tuig human gitabangan sa kagamhanan sa dakbayan nga mahiluna sa kasamtangan niining nahimutangan, ang Santa Rita de Cascia Women’s and Children’s Center aduna nay 40 ka mga batangay babaye nga nagpahimulos sa programa niini.

Ang maong mga bata nagpaalim gikan sa ilang bati nga mga kasinatian human sa abuso nga ilang nadawat gikan sa ilang mga kauban sa pamilya o sa mga kaparyentihan.

Gihulagway ni Nicole Ivanka Princess Ebcas, ang in-house social worker sa halfway house, nga aduna silay mga programa aron mahupay ang kasakit nga dili man makalimtan sa mga bata.

Ang maong mga programa, matud niya, makatabang nga mahibalik sa normal ang kinabuhi sa mga bata gikan sa pagpangabuso.

Lakip sa ilang mga lihok ang pagparehistro sa mga bata nga gibiyaan lang sa ilang mga ginikanan ug pagpatungha kanila sa klase pinaagi sa Alternative Learning System, module, ug lahos na ngadto sa kolehiyo. Anaa ganiy nikuha og kurso nga social worker aron sab makabawos og tabang sa ilang institusyon.

“Ang mga bata among gipaeskwela. Aduna kanilay naundang, naa puy wala ka-eskwela, maong among gipa-apply sa educational,” pulong ni Ebcas.

Gawas niini, aduna usay programa sa panarbaho nga giandam ang Santa Rita aron adunay matigom nga kwarta ang mga bata alang sa ilang dugang panginahanglan. 

Ang mga bata among gipaeskwela. Aduna kanilay naundang, naa puy wala ka-eskwela, maong among gipa-apply sa educational (program).

Usa kanila, nga tagoon ta sa pangalang Inday, malipayong nibutyag nga nakapadayon siya sa iyang pagtungha gawas pa sa pagtrabaho. 

“Dapat ipadayon gyud ang pag-eskwela. Kay bisan walay nadato sa eskwela, pero daghang nagmahay kay wala kaeskwela. Gusto ko’g face to face kay naay interaction, karon module pa,” pulong niya. #