Ni Rey Pasaporte
PIO Reporter

CITY HALL, Cebu City (Sept. 7, 2022) — Gitahasan karong adlawa ni Mayor Mike Rama ang iyang kapikas nga si Malou nga maoy mangulo sa pagpanindot sa mga kadalanan niining dakbayan subay sa tinguha nga ang siyudad mahisusama sa nasud sa Singapore.

Gipakighinabian sa kapikas ni Mayor Mike Rama, Malou M. Rama, ang mga mag-uuma ug tanom sa dakbayan aron sutaon unsay mahimo nilang matabang sa pagpanindot sa mga kadalanan sa dakbayan. (PIO/Allan Defensor)

Usa sa unang lakaw ni Malou mao ang pagtigom sa mga mag-uuma og mga tanom sa nagkalainlaing mga bukirang barangay kauban ang Cebu City Parks and Playgrounds Commission (CCPPC) aron masayran kung unsay ilang matampo nga makapanindot  sa mga kadalanan sa dakbayan.

“Kamo mo-share pud mo sa inyohang unsay naa didto sa bukid nga makapanindot diri sa city. Proud sad mo ana sa umaabot nga panahon. Dili lang sad para ninyo, proud mo sa inyong mga anak, mga apo. Maka-share mo sa mga apo nga ‘usa baya mi sa…nakatabang sa siyudad sa Sugbo’,” sulti ni Malou.

Kamo mo-share pud mo sa inyohang unsay naa didto sa bukid nga makapanindot diri sa city. Proud sad mo ana sa umaabot nga panahon. Dili lang sad para ninyo, proud mo sa inyong mga anak, mga apo. Maka-share mo sa mga apo nga ‘usa baya mi sa…nakatabang sa siyudad sa Sugbo.

First Lady Malou Rama

“Kani siya nga programa, programa ni sa dako nga grupo headed by, in fact wa ko masayop apil pa si Koko Holganza, with my wife. Kani tanan sila mga stakeholders, apil ang (City) Planning (and Development Office), apil ang (Department of) Engineering (and Public Works), apil ang tibuok nga mga naa sa City Hall,” pulong sab ni Mayor Rama.

Ang dakbayan nagkinahanglan karon og daghang mga tanom nga bulok green aron ipamutang sa mga kadalanan.

Matud ni Joelito Baclayon, labaw sa CCPPC ug sa City Agriculture Department, nagkinahanglan ang kagamhanan og daghang mga tanom hinungdan nga ilang gitapok ang mga mag-uuma og tanom gikan sa mga barangay sa Kalunasan, Sapangdaku, Pung-ol-Sibugay, Pamutan,Tabunan, ug Buhisan.

Mga masitas sama niining libreng gipanghatag atol sa Tagbo Tabo sa may Plaza Sugbo sa may City Hall maoy gipangita karon sa kagamhanan sa dakbayan aron idayandayan sa mga center island sa mga kadalanan. (PIO/Russel Fullozos)

Ingon niya, wala sila nagkinahanglan og mahalon nga mga tanom; ang ilaha lang mao ang gidaghanon sa mga tanom nga ilang magamit.

“Ngakinahanglan mi og daghang carabao grass; kana bitaw sagbot nga pwede nato itanom sa atong mga islands. Any nga mga sagbot nga pwede nato himoong itapak sa atong mga islands, sa atong mga parke,” sulti niya. #

Gipapanumpa ni Mayor Mike Rama ang mga mag-uuma og tanom nga nitambong sa gipatawag niyang tigom karong adlawa nga moabag sila sa gidamgo sa administrasyon nga mahisusama sa Singapore ang dakbayan sa Sugbo. (PIO/Allan Defensor)