Ni Russel Fullozos
PIO Reporter

CEBU CITY (Septiyembre 1, 2022) — Pormal nga gihatag kagahapon sa usa ka pribadong kompaniya nga gikan sa nasud sa Finland ang usa ka cleantech nga barko nga maoy manilhig sa mga basura sa kadagatan sa dakbayan, ilabi na diha sa may bukana sa mga dagkong sapa.

Hannu Makela, chief operating officer sa Clewat, Inc. (Hulagway: https://clewat.com/en/company/)

Si Hannu Makela, chief operating officer sa Clewat, Inc., niingon nga tuyo nilang gitunol ang barko aron makatabang sa dakbayan sa Sugbo, subay sab sa ilang Memorandum of Agreement sa kagamhanan.

Ingon niya, gusto unta nila nga malimpiyohan og apil ang kasapaan pinaagi sa pagpasiot sa barko sulod sa mga sapa apan dili mahimo tungod sa kamabaw na ug ka hagip-ot sa mga sapa.

Sigon sa iyang website, ang Clewat usa ka kompanya nga alang sa paglambo sa teknolohiya alang sa kalikopan.

“Kami sa Clewat nag-amping sa paglambo sa kinaiyahan matag adlaw. Among misyon ang pagwagtang sa mga plastik sa mga kadagatan pinaagi sa usa ka himan nga manglimpyo sa dagat nga hinimo sa among tigmugna nga si Johannes Myllykoski. Ang himan motrabaho sa luwas sa kalikopan gamit ang bul-og sa tubig. Maayo sab kini og agi ug mokolekta hangtod sa 200 metriko kubiko nga basura kada oras,” sigon sa website sa pinulongang Ininglis.

Nahulma ang kahanas ni Myllykoski, nga maoy founder, chairman of the board, ug chief innovator sa kompanya, sa iyang kanhi trabaho pagsuway sa lainlaing mga kahimanan sa paglimpyo sa oil spill.

Nangandam ang mga River Troopers ilawom sa buhatan sa Cebu City Environment and Natural Resources Office sa paghipos sa mga basura nga tinapok sa barko. (PIO/Allan Cuizon)

Pulong ni Makela, ilang napilian ang dakbayan sa Sugbo kay kini ang kinadak-ang dakbayan gawas sa Manila ug ilang gitag-an nga daghan sab kaayo ang basura.

Ang dagkong mga kasapaan sa dakbayan mao ang Mahiga, Lahug, Parian, Guadalupe, Kinalumsan, Cogon, ug Bulacao.

Sa iyang bahin, gihangop ni Mayor Rama ang kalamboan nga ani-a sila si Makela sa dakbayan kay nitabang kanato sa pagpanglimpyo.

Mayor Mike Rama sa iyang pakigpulong sa mga nanambong sa paglusad sa barko nga manglimpyo sa mga basura sa dagat sa akong dakbayan. (PIO/Allan Cuizon)

Hangyo niya sa mga tawo mao nga nitabang man gani ang mga langyaw nga limpiyohan ta ang atong tugkaran, mas angay gyud unta manglimpyo kitang mga Sugboanon.

“Para ra na sa atong kaugalingong kaayohan. Manglimpyo, magkahiusa, look forward in one direction,” sigon ni Mayor Rama.

 Kabahin sa paglimpyo sa dakbayan, gisulti niya sa mga bisita nga “political will” ang gikinahanglan aron mahapsay ang siyudad.
“It needs political will, be afraid in the wrath of God. Let’s do it now, do not worry of losing (in the next elections), what is important is right, do it right,” ingon niya.  #

The water cleaning project in Philippines continued with the opening ceremony