PNP gipasaligan iapil sa housing sa kagamhanan

Ni Russel Fullozos
PIO Reporter

CEBU CITY (August 30, 2022) — Gawas sa apektado sa pagpatuman sa mga balaod sa tres metros nga easement sa mga kasapaan, tinguha karon ni Mayor Mike Rama nga ilakip ang mga sakop sa Philippine National Police (PNP) sa socialized housing nga programa sa kagamhanan.

Kini kay daghan pa kanila ang wala pay kaugalingong panimalay tungod sab lagi sa kamahal.

Iya kining gibutyag atol sa pagsaulog sa Police Regional Office (PRO)-7 sa ika-121 nga Police Service Anniversary hain si Mayor Rama ang pinasidunggang dinapit.

“As soon as possible there will be MRBs (medium-rise buildings), with (Retired PNP Chief) Debold Sinas to help. Service honor and justice; continuing to bring what is best for our police,” sulti sa mayor.

Gihangop ni Police Lieutenant Colonel Wilbert Parilla, deputy director for administration sa Cebu City Police Office, ang gipadayag ni Mayor Rama, kay dako kini og ikatabang sa iyang mga kaubanan aron dili nalang mag-abang ila na kadtong mga gikan pa sa probinsiya nga walay kasak-an.

“Mao nay nindot kaayo nga reward. It is an added boost to our morale,” ingon niya.
Laraw sa pangagamhanan ni Mayor Rama ang pagtukod og dili mominos lima ka mga MRBs nga maoy papuy-an sa mga gipapahawa sa ilang mga pinuy-anan nga anaa mahimutang sa mga tampi sa mga kasapaan sa dakbayan.

Kini aron paglikay sa disgrasya ilabi na kung magsige og uwan ug modako o kaha moawas ang tubig sa mga kasapaan. #