Ni Russel Fullozos
PIO Reporter

CEBU CITY (Agusto 25, 2022) —  Walay pili, tanan nga nakita nga nakalapas sa tres metros nga easement sa mga kasapaan gi-issue-han og notice of violation. 

Labot sa gisiguro nga mahatagan og notice kadtong mga balay patigayon nga gipanag-iya sa mga iladong mga negosyante sa downtown nga bahin sa dakbayan.

Atty. Gerry Carillo. (PIO/Ruel Rosello)

Kini ang gipatuman sa pito ka mga teams nga gilangkoban apil sa Cebu City Disaster Risk Reduction and Management Office (CCDRRMO) sulod na sa duha ka adlaw nga pag-tagging ug paghatag sa notice.

“Yes, walay exempted,” kini ang mubong tubag ni Atty. Gerry Carillo, chairman sa Cebu City Disaster Risk Reduction and Management Council, dihang gipangayoan og katin-awan sa Cebu City News.

Subay ang nagpadayong tagging sa mando ni Mayor Mike Rama nga mahawan ang easement sa mga kasapaan sulod sa unang 100 ka adlaw sa iyang bag-ong termino isip mayor.

“Cutting of buildings will have to be pursued. Legal intervention has to be resolved so that we will be able to bring back these waterways,” bahad ni Mayor Rama sa iyang pagpamulong atol sa unang session sa ika-16 nga konseho sa Dakbayan sa Sugbo niadtong Hulyo 6.

Mga istruktura nga sama niini, nga nisulod na gani sa Estero Parian, ang siguradong lakip sa mga ipaguba unya tungod sa paglapas sa balaod sa easement. (Hulagway: Sugbo Bike Lanes)

Ganiha, Gilukop sa Team 5 ang mga lugar sa Estero Parian sa may downtown, diin anaa mahimotang ang mga dagkong edepisyo nga nisakop gyud sa sa sapa. Apil sila sa mga nakadawat sa pahibalo nga kinahanglang boluntaryong moguba sa bahin sa ilang istruktura nga nakalapas sa easement sulod sa pito ka adlaw human nadawat ang pahibawo.

Ang easement mao kanang sukod nga tres metros gikan sa tampi sa masigkakilid sa kasapaan sa dakbayan nga kinahanglang walay bisan unsang mga istruktura nga gitukod. Sumala kini sa Presidential Decree No. 1067 (Water Code of the Philippines) ug sa DENR Administrative Order No. 2021-07 (Guidelines on the Establishment of Legal Easements Along the Seas, Rivers, Lakes, Esteros, and Creeks).

Lakip kining maong maanindot nga balay ang makabhangan unya tungod kay may bahin kini nga nasulod na sa tres metros nga easement sa Mahika Creek. (Hulagway: Sugbo Bike Lanes)

Ang Article 638 sa Republic Act No. 386 (Civil Code of the Philippines) naglatid sab nga “The banks of rivers and streams, even in case they are of private ownership, are subject throughout their entire length and within a zone of three meters along their margins, to the easement of public use in the general interest of navigation, floatage, fishing and salvage.”.

Mao sab kini ang gisaysay ilawom sa Section 1, Paragraph E sa City Ordinance No. 1764, nga nagtukod sa City River Eco-Park Management Commission (CCREPMC), nga maoy gitahasan nga mopalambo, modumala, ug moayo sa mga dagkong kasapaan ug estero sa dakbayan.

Ang marka nagpasabot sa asa kutob nga bahin niining konkreto nga istruktura ang angay bakbakon kay nasulod sa tres metros nga easement. (PIO/Allan Cuizon)

Pipila sa mga inilang dagko nga edepisyo nga nikuha sa easement sa Estero Parina mao ang Gaisano Main, ang habig sa bodega  138 Mall, Colonade Mall, Dimsum House, The Freeman, Habour City Dimsum, Avila Building, Ramirez building ug uban pa.

Matod pa ni Marissa Comaingking sa CCDRRMO nga lakip sa nipatuman sa tagging, wala silang nasugatong suliran sa ilang pagpahibalo. “Wala may resistance atong nasugatan. Hinuon, ipatawag man pud na sila sa barangay. Kung duna silay problema adto nila ipaabot,” ingon niya. #