P27M nga ayuda alang sa PWD ihatag ugma

Ni Rey Pasaporte
PIO Reporter

CEBU CITY (Agusto 22, 2022) — Ipang-apud-apod sugod ugmang adlawa, Martes, ang hinabang pinansiyal alang sa 13,337 ka mga rehistradong Persons With Disabilities (PWD) dinhi sa dakbayan.

Madawat nila ang P2,000 kada usa, o kinatibuk-ang balor nga P26.674 milyones nga alang sa mga buwan sa Hunyo ug Hulyo, nga maoy nasayo sa paghikay sa City Treasurer’s Office (CTO).

Kaganihang buntag, gitigom ni City Administrator Suzzane Ardosa ang pipila ka mga kawani sa City Hall nga maoy magsilbing disbursing officers (DO) sulod sa lima ka mga adlaw sa pagpanghatag sa ayuda.

Sigun sa nasabotan sa tigom, anha sa nagkalainlaing gym o sa barangay hall ang pagpanghatag sa ayuda sa unang adlaw; samtang sa ikaduhang adlaw, magbalay-balay na ang mga DO alang sa mga pagpanghatag sa mga PWDs nga maglisud na sa paglakaw.

“Sa second day will be house-to-house so og naay apurado raba gyud nga magsige follow-up ingna lang sa second day na mi mohatod,” pahinumdom ni Ardosa sa mga DO.

Sa ikatulo hangtod na sa ikalima o katapusang adlaw, adto na mokuha ang mga PWD sa ilang ayuda sa buhatan sa CTO sa City Hall.

Sa second day will be house-to-house so og naay apurado raba gyud nga magsige follow-up ingna lang sa second day na mi mohatod.

Suzzane Ardosa, City Administrator

Gihangyo sab ang mga opisyales sa barangay sa pagtabang sa mga DOs sa una ug ikaduhang adlaw sa pagpanghatag.

Kung maglisod na sa pagpirma ang usa ka PWD, gihatagan og katungod ang asawa, bana, o ang anak nga maoy kuyog sa pagkuha sa ayuda. Kinahanglan lang nga mopakita og balido nga ID ang papirmahon sa payroll.

“Ato na man siguro na…nga na praktis nga ilang isuwat ilang pangan ‘nya atong papirmahon nga sila maoy guardian, dayon atong pa-witness-san sa barangay captain nga nag-assist nato,” pulong ni Flora Bering sa Department of Social Welfare and Services (DSWS).

Siya ang Gender and Development (GAD) focal person sa DSWS alang sa mga PWDs.

Nasabotan sab sa tigom nga gidilli na ang authorization letter sa mga PD aron makuha ang ilang ayuda.

Laing pahinumdom mao nga kadtong mga PWD nga ni-expire na ang ID pagbuwan sa Hunyo makadawat gihapon bisan wapa pa ka renew sa DSWS apan P1,000 (alang sa Hunyo) ra ang madawat.

Ug kung namatay na ang usa ka PWD, dili hatagan sa ayuda ang mokuha sa kwarta apan itunol siya ngadto sa DO sa buhatan gyud sa DSWS.#