Ni Renato Pasaporte
PIO Reporter

CEBU CITY (Agusto 13, 2022) — Nagmaya ang mga senior citizens sa dakbayan karong adlawa human gisugdan sa kagamhanan sa pagtunol ang ilang P3,000 nga hinabang pinansiyal.

Dili angay mabalaka ang mga wala pa makakuha kay mobalik ang pagpang-apud-apod karong Lunes og sa mosunod pa nga upat ka mga adlaw, nga maglakip na unya sa pagbalaybalay nga paghatag alang niadtong mga seniors nga maglisod na sa paglakaw.

Pahiyom ang gisukli niining usa ka lola sa barangay Lahug sa pagdawat niya sa iyang hinabang pinansiyal karong adlawa, Agusto 13, 2022, gikan sa kagamhanan sa dakbayan. (PIO/Ruel Rosello)

Gipahinumdoman lang ang mga seniors nga sa karong hugna dili dawaton ang authorization, maong kung dili personal nga makakuha ang usa ka senior maghuwat lang siya nga adtuon sa ilang panimalay.

Sa kinatibuk-an, moabot sa 89,281 ka mga senior citizens sa dakbayan ang makadawat unya sa ilang tag-P3,000, o ang P1,000 nga binuwan nga ayuda sa dakbayan alang sa Hunyo, Hulyo, ug Agusto. Kini nagpasabot nga nigahin ang kagamhanan og P267.843 milyones alang sa karon nga hugma sa pagpanghatag.

Dili kabayran ang talidhay ni lolo. ((PIO/Ruel Rosello)

Sa maong gidaghanon sa hatagan, adunay 1,831 ka mga senior sa habagatang distrito ug 1,844 sa amihanang distrito nga maglisod na sa paglakaw.

Sagad sa mga seniors nga nahinabi sa Cebu City News karong adlawa niingon ang nadawat nilang kwarta ilang magamit sa pagpalit sa ilang maintenance nga tambal ug pagkaon.

“Palit og Losartan para sa high blood. Napu akong paliton inigkahurot palit na sad…. Magpasalamat ko ni City Mayor Mike nga naa tay hinabang,” pulong ni Almaguio Aniñon,72, taga-Barangay Lorega San Miguel.

Sa talaan sa Office of the Senior Citizens Affairs (OSCA), ang Lorega San Miguel adunay 826 ka kwalipikadong senior citizens,hain 197 may cash card nga wala hulogi sa karon nga hugna sa pagpanghatag.

“Mag-validate pa man gud ta naa pa ba ni sila o wala.  Nakadawat ni sila sa una through ATM. Karon, gipaari gyud sila.  Naa man guy uban patay na ‘nya lain nay ga-claim,” sumala ni Lea Alburo, disbursing officer ubos sa buhatan sa Division for the Welfare of the Urban Poor (DWUP).

Ang pagpanghatag sa hinabang moundang ugma, Domingo, aron makapahuway sab ang mga pagador. Apan mobalik sila sa mga barangay inigka-Lunes, Agusto 15, ug sa mosunod pa nga mga adlaw aron gitawon ang pagpang-apud-apod ilabi sa mga seniors nga maglisod na sa paglakaw. (PIO/Ruel Rosello)

Ang 64 anyos nga si Amelia Catubig, taga-Lahug, usa sa na-isyohan og cash card. Sayo siyang nikuha sa iyang ayuda diha sa Lahug Elementary School kay gipahibawo na siya nga wala hulogi ang iyang ATM.

“Kada pay-out sa Landbank nako withdraw-hon. Karon, diri na kay wa man sudli. Ipalit nako ni para konsumo.  Pasalamat ko sa City Government nga  nanghatag sila ani atong financial para mga seniors,” pulong niya.

Gipasalig sa kagamhanan nga bisan kung wala gitugot alang sa karon nga pagpang-apud-apod ang “authorization letter”, adtuon gyud sa mga pagador kadtong mga seniors nga maglisod na sa paglakaw. (PIO/Ruel Rosello)

Ang Lahug adunay 2,526 ka kwalipikadong senior citizens hain 153 kanila maglisod na sa paglakaw.

Moabot sab og 2,301 ka kwalipikadong senior citizens sa mga taga-Barangay Apas,105 nila maglisod na sa paglakaw,1,340 ang naa nay cash card, samtang 24 niini ang wa pa nakuha gikan sa buhatan sa OSCA.

Melchora Villarta. (PIO/Ruel Rosello)

Matud ni Lily Sabiona, 61, dako nang tabang ang nadawat nila nga kwarta kay magamit alang sa pagpalit og pagkaon ug maintenance nga tambal.

Nidugang siya nga gamay ra man tuod ang usa ka libo matag buwan, apan dako na kini kung matigom.

Lahi pud si Melchora Villarta, 62, taga-Mambaling, kay matud pa niya nakapuhonan siya sa iyang gamay nga negusyo sa hinabang pinansiyal alang sa seniors.

“Human sa pandemic man ko nakadawat ani. Mao to, akong gihinayhinay og puhonan nga og makakobra ko ako ikompra og balik para modako,” pulong niya.

“Rolling store ba, akong tinda mga burloloy, pugong, hair bun, mga mask, medyas. Wala pa koy maintenance, puyra buyag…. Nagpasalamat ko sa mayor ng naapil ko ani sa paghatag,” dugang niya. #