Ni Rey Pasaporte PIO Reporter
CEBU CITY (Aug.10, 2022) — Ipang-apud-apod sa kagamhanan sugod karong Sabado, Agusto 13, 2022, ang hinabang pinansiyal alang sa 89,281 ka mga senior citizens sa dakbayan.
Ang madawat nila ang ayuda nga balor og P3,000 kada usa alang sa mga buwan sa Hunyo, Hulyo, ug Agusto.
Kagahapon sa hapon, nipatawag si City Administrator Suzanne Ardosa og tigom sa mga kawani sa City Hall nga maoy magsilbing disbursing officers (DOs) sulod sa lima ka mga adlaw, nga magsugod karong Sabado.
“Sama sa naandan, magtinabangay gihapon ta sa pag-adto sa nagkalainlaing barangays para mas madali ang atong pagpanghatag,” pulong ni Ardosa.
Ang pagpanghatag sa ayuda anha himoon sa mga eskuylahan ug gym sa nagkalain-laing barangay. Gawas niini, mogahin sab ang kagamhanan og laing lima ka mga adlaw nga magbalay-balay aron ihatod ang hinabang sa mga senior nga maglisod na sa paglakaw.
Ang kabahin sa Punta Princesa kansang eskuylahan gihimo pa nga evacuation center, niingon si Dr. Ester Concha, ang labaw sa Department of Social Welfare and Services (DSWS), nga adto himuon ang pagpanghatag sa Lourdes Parish Church human sa pakig-alayon unya sa mga opisyal sa barangay.
Sumala sa talaan sa Office of the Senior Citizen Affairs (OSCA), adunay 1,831 ka mga senior sa habagatang distrito ug 1,844 sa amihanang distrito nga maglisod na sa paglakaw.
Giawhag ni Dr. Concha ang mga senior citizens nga makahimo pa nga sila gyud mismo ang moadto gyud sa gym o sa eskuylahan sa pagkuha sa hinabang kay wala na gitugot ang “authorization letter”.
“There will be no more authorization, so tanang able should come to the area to collect sa ilang financial. Then gitagaan nato og leeway, another next five days will be for hatod gyud na siya. Walay pag-entertain nga himoon diri sa City Hall during that time. No authorization, no pink slip,” pulong ni Concha.
“Kung asa atong area, like barangay hall or gym, seguro on the first day naa ta tanan (. Pero inigtan-aw nato sa second day, gamay nalang, gamay nalang,…kung wala na gyuy moduol, then we’ll start the house-to-house,” dugang niya.
There will be no more authorization, so tanang able should come to the area to collect sa ilang financial. Then gitagaan nato og leeway, another next five days will be for hatod gyud na siya. Walay pag-entertain nga himoon diri sa City Hall during that time.
Dr. Ester Concha, labaw sa Department of Social Welfare and Development
Mausab pa hinuon kini, ilabi na kay niingon si City Administrator Ardosa nga lahi ang manghatag sa mga eskuylahan ug sa gym sa magbalay-balay nga mang-apud-apod sa hinabang.
“Naay usa ka team ga-house-to-house, naay usaka grupo nga naa sa gym. Kay ngano? Ang kanang tua sa balay, di gani nimo adtuon, the same day nga nanghatag sa gym, yayongan nila ang tiguwang dad-on sa gym, di na mosugot nga moulahi na sila og dawat,” ingon niya.
“Sa akong experience, sa akong nahibaw-an, katong sa una nga ‘huwat ra mo maam kay adtuon’, ‘nya madugay? Isakay og karumata, agakon, i-wheelchair, i-ambulansya, ug uban pa. Kung di gani, maggsige’g balik-balik sa gym, ‘mam kanus-a adtuon’?” ingon sab ni Ardosa.
Sa mga senior nga nitaliwan na sulod sa Hunyo, Hulyo, o sa Agusto, tambag ni Concha nga dili una ihatag ang kwarta sa mga sakop sa pamilya kay ari kuhaon sa iyang buhatan ang ayuda ug sa lain nga paagi.
Lakip unya sa dad-on sa tagtungod sa namatay nga senior citizen sa buhatan sa DSWS mao ang death certificate, baptismal certificate sa namatay, ug balido nga ID sa bana o sa asawa. Kung dili kasado, ang dalhon mao ang birth certificate sa anak. Kung walay anak, certification gikan sa barangay hain sila nagpuyo.
“Walay mahatag (karong Sabado ug sa mosunod nga upat ka mga adlaw) alang sa namatay na nga senior citizen nga ang mo-claim ang family member,” ingon ni Ardosa. #
Cebu City • News & Information 