By Rey Pasaporte
PIO Reporter
CEBU CITY (Agusto 10, 2022) — Padayon ang Local School Board (LSB) sa kagamhanan sa dakbayan sa paningkamot niini nga mapaayo ang nangaguba nga mga tunghaan human niigo ang bagyong Odette niadtong Disyembre 16.
Pulong ni Melissa dela Cruz, labaw sa LSB, nga 4,488 (87.1 porsiyento) na sa kinatibuk-ang 5,153 ang magamit na karong sugod sa klase sa Agusto 22.
Kini nagpasabot nga anaa nalay 665 (12.9 porsiyento) ka mga classrooms ang kinahanglan pang ayohon.
Ingon ni dela Cruz, moabot sa 767 ka mga classrooms ang na-report sa ilang buhatan nga nangaguba gumikan sa pagkusokuso sa bagyong Odette ug ila dayong gisugdan sa pag-ayo.
Gani adunay 156 ka classrooms ang padayong gi-ayo sa pagkakaron samtang moabot na sa 125 ang nakumpleto sa pag-ayo, o suma-total 281 na ang giayo ug gitrabaho sa LSB.
“Nagkahinayhinay ta og apas sa number of classrooms nga needed for November, which is atong full face-to-face classes. So, take note ang giingon ni President Marcos is August ang atoang limited face-to-face. Dili pa magamit ang tanan natong classrooms during that time,” ingon ni Dela Cruz.
“Katong nahabilin nga classrooms mao toy mga classrooms nga naay major damage so dili nato magamit ang 12 percent nga classrooms,” dugang niya.
Nagkahinayhinay ta og apas sa number of classrooms nga needed for November, which is atong full face-to-face classes. So, take note ang giingon ni President Marcos is August ang atoang limited face-to-face. Dili pa magamit ang tanan natong classrooms during that time.
Melissa dela Cruz, labaw sa LSB
Giklaro ni dela Cruz nga ang mga classrooms nga wala pa naayo hangtod karon anaa sa mga tag-as nga mga istruktura maong dili maayo sa LSB kay dili niya irisgo ang kinabuhi sa ilang trabahante.
Giingon hinuon ni dela Cruz nga duna na may gihatag ang nasudnong buhatan sa Department of Education (DepEd) alang sa pag-ayo sa mga eskuylahan.
Naningkamot sab ang LSB ug DepEd nga makakita og sponsors sama sa Duros Construction, Dakay Construction, ug pamilyang Lhuillier nga maoy mopaayo sa dagkong mga istruktura sa eskuylahan.
“Both kami sa LSB ug ang Dep-Ed nagtinabangay mi sa mga stakeholders. For example, ang Lhuillier na silay gipang-adopt nga eskuylahan, tulo na ka eskuylahan. Sama pud sa Dakay Construction, gi-adopt pud nila ang Lahug, ang City Science High, ang Oprra,” ingon ni dela Cruz.
“Nanawagan pud me through our PIO office and through ni Mayor Mike nga magpatabang sa mga contractors nga willing mo take sa roof even if kuan kanang community service nila nga maka-fix,maka-help sila sa atong mga eskuylahan, especially those nga duol ra sa ilang opisina o sa ilang mga headquarters. Mao na among approach so far,” dugang asoy niya. #
Cebu City • News & Information 