Ni Russel Fullozos
PIO Reporter

CEBU CITY (Agusto 9, 2022) – Gamay nalang nga pagpahiuyon mahibalik na ang kaniadtong pangita sa mga manindahay sa Freedom Park nga gipabalhin sa Interim Building sa Carbon Public Market.

Kini kay nakita sa kadaghanan nga nisugod na og saka ang ilang halin kay ang mamalitay nakatultol na man sa ilang nahimutangan.

Usa kanila si Jojie Genobatin, ang labing unang nipahawa sa iyang pwesto. Niangkon siya nga sa sinugdanan nabalaka siya sa sitwasyon, apan paghawan na’g sugod sa karaang tindahan, hinay-hinay nga namalik ang iyang mga suki nga natagbaw sa iyang serbisyong paninda og pagkaon nga barato ang presyo apan lamian.

Mas ganahan ang managtiayong Noel and Judy Manguilimutan sa kahimtang karon sa merkado sa Carbon kay gawas nga anaa sila sa limpyo ug hamugaway nga lugar, mas ganahan sab ang mga tawo kay hawan na ang mga kadalanan. (PIO/Allan Cuizon)

“Una kong na-evict jud sa bahay ni kuya, pero namalik na atong mga suki, budget meal nga 50 pesos may softdrinks na ka,” pulong niya.

Laing manindahay nga nagagikan sa Freedom Park mao si Judy Manguilimotan, nga nasinati ang dakong kausaban human niluag na ang kadalanan sa Carbon. Pulong niya, sa kadugay na niyang manindahay nibalik ang iyang karaang kasinatian nga luag, hapsay nga umaabot.

Ang bana niya nga si Noel dako sab nga uyon nga sila nabalhin kay mas limpyo ug hamogaway ang lugar nga ilang nasinati karon.

Avelyn Suico. (PIO/Allan Cuizon)

“Luag kaayo ni.  Sa una six lanes, paghuot mura’g bati ang halin. Karon ang mga kustomer namalik kay limpyo ug luag na ang dalan,” pulong ni Judy.

Sukwahi sa mikatap nga bakak nga naglisod ang manindahay og buwak sa Freedom Park, mas gikalipay hinuon nila ang ilang pagkabalhin.

Alang kang Avelyn Suico, 42, mas limpyo, hayahay, ug luag ang ilang pwesto itandi kaniadto nga daghang ilaga ang magsabaysabay.

“Ganahan kaayo ko diri. Motultol man gihapon ang mga kustomer, dili na mi mag-ilog kay makapili man sila ug daghan,” pulong ni Suico.

Mao sab kini ang ang nasinati ni Florimel Bontilao, taga-Barangay Malubog, nga nagpasalamat sa tabang nga gihimo sa kagamhanan alang kanilang mga manindahay.

“Okay man ang sales nako. So far, wala pa man pud mi mapasmo. At least wala mi pasagdi sa gobiyerno,” pulong niya.

Sa kinatibuk-an, niingon ang mga manindahay nga mas kusog ang ilang halin sa kadlawon ngadto na sa dili pa moabot ang kaudtohon kay maoy sagad modagsang ang mga pumapalit. #

Mayor magpatabang sa DILG sa ‘night market’ sa Carbon