Ni Rey Pasaporte
PIO Reporter

CEBU CITY (Agusto 3, 2022) — Gipadala na sa City Treasurer’s Office (CTO) ang iyang tubag human nakadawat og  subpoena sa niaging semana gikan sa National Bureau of Investigation (NBI)-7.

Kabahin kini sa sa padayong pagsusi sa NBI-7 sa gidudahang iregularidad sa kontrata sa paghakot sa mga basura sa dakbayan niadtong 2021.

Si Mare Vae Reyes, labaw sa CTO, niingon nga ilaha nang gipadala ang mga vouchers ug uban pang mga dokumento nga gipangayo gikan kanila sa NBI-7

Mare Vae Reyes. (PIO/Ruel Rosello)

“Unfortunately, ang (City) Treasurers Office man gud di man depository sa mga documents. Once makabayad na mi among i-forward sa (City) Accounting Office for post-audit. So, tanang documents tua na sa City Accounting Office, ‘nya after sad didto ila sad na i-forward sa COA (Commission on Audit),” ingon niya.

“Ang amo ra gyung ma-keep is ang date, ang check number, payee, amount kung anus-a namo na-release pud. So mao ra na among data nga gihatag namo sa NBI. Mao ra pud na akong data isulti sa NBI inig-adto nako August 9,” dugang ni Reyes.

Kabahin sa gipangayo nga contract of service nga gipangayo sa NBI, niingon siya nga laing opisina ang makahatag niini.

Unfortunately, ang (City) Treasurers Office man gud di man depository sa mga documents. Once makabayad na mi among i-forward sa (City) Accounting Office for post-audit. So, tanang documents tua na sa City Accounting Office, ‘nya after sad didto ila sad na i-forward sa COA (Commission on Audit).

Mare Vae Reyes, labaw sa CTO

“I think ang BAC (Bids and Awards Committee) man siguro maoy mo-kuan ana. Then inig-processing gyud ana from BAC ang end-user DPS (Department of Public Services) man, basically mag-compile sa tanang requirement una ipadagan for payment. So, once ma-compile na, ipadagan for payment sa Budget Office, Accounting, CTO, then for approval sa mayor or city admin, then paghuman balik sa amoa for tseke na,” sulti ni Reyes.

Sa iyang bahin, si Atty John Jigo Dacua, labaw sa DPS, nibutyag nga wa pa siya pangayo-i sa NBI og dokumento kabahin sa gihimo niini nga pakisusi.

Apan giklaro niya nga andam siyang motabang sa NBI-7 ug nga naa na siyay giandam daan nga mga dokomento nga sa iyang tan-aw maoy kinahanglanon kung ugaling pangayoan na siya.

Ang mga residente sa Barangay Lorega-San Miguel nagdala sa ilang mga basura sa gawas sa ilang mga balay ug sa naghulat nga trak sa basura, pagkahuman naabot ang trak sa ilang kasilinganan. (PIO/File)

“Wa man tay laing buhaton maghuwat ra mi kanang sa NBI. Pero rest assured  mo-cooperate ta sa DPS. Maghuwat ra ta kanus-a ta ipatawag..ready ra atong mga documents. Ug ilang gikinahanglan, atong ihatag nila,” pulong ni Dacua.

Niingon siya nga ang ubang mga dokumento ila nang naduso ngadto sa City Accounting Office apan mo-request ang DPS ug kopya sa higayon nga nagkinahanglan na ang NBI. #

Read related story: Mayor orders cooperation in NBI garbage contract probe