Ni Rey Pasaporte
PIO Reporter
CITY HALL, Cebu City (Hulyo 30, 2022) — Gitudlo karong hapon ni Mayor Mike Rama si kanhi konsehal Koko Holganza sa iyang gitukod nga beautification project “management board” isip kabahin sa mga lihok pagkab-ot sa gipangandoy nga masusama sa Singapore ang dakbayan.
Kini human sa tigom nga gipatawag sa mayor tali sa pipila ka mga labaw sa Departamento sa City Hall.
Naglangkob sa beautification project mao ang Prevention, Restoration, Order, Beautification, Enhancement (PROBE); City Environment Sanitation and Enforcement Team (CESET); Cebu City Environment and Natural Resources Office (CCENRO); City Agriculture Department (CAD); Department of Public Services (DPS); Department of Social Welfare and Services (DSWS); Cebu City Transportation Office (CCTO); Cebu City Tourism Commission; pribadong sector; ug uban pa.
Si pakighinabi sa Cebu City News, niingon si Holganza nga aduna nay pasiunang mga lakang nga gihimong pagpanindot og sugod sa dakbayan ang mga hingtungdang departamento.
“Kani pagpalig-on lang nga naana gyuy regular pag-reporting kun unsa na may mga kalihokan nga gihimo sa kada departamento, kada committee,” ingon niya.
Gipaabot nga sulod sa 100 ka mga adlaw sukad sa paglingkod ni Mayor Rama aduna nay makita o resulta sa pagpanindot sa mga bahin dinhi sa dakbayan sa Sugbo.
Ingon ni Holganza, daghan na sila og mahimo sulod sa 100 ka adlaw, apan dili sab maingon nga unsa unyay makita inigkahuman sa maong mga adlaw mao na kana ang gitumbok nga makab-ot sa pagpanindtot sa dakbayan.
“Sulod sa 100 days siguro we can move forward, pero di pa dayon na nga moingon ta mao na gyud na siya atong gi target di ba? Ang importante lang nga within the first 100 days, kung unsa tong nasugdan sa paglingkod gyud niya (Mayor Rama) sa bag-ong termino nga molihok na ta padung didto,” ingon niya.
Sulod sa 100 days siguro we can move forward, pero di pa dayon na nga moingon ta mao na gyud na siya atong gi target di ba? Ang importante lang nga within the first 100 days, kung unsa tong nasugdan sa paglingkod gyud niya (Mayor Rama) sa bag-ong termino nga molihok na ta padung didto.
Koko Holganza
“What is important is people will start taking the first step ba kay kung di gud na nimo sugdan og lihok bisa’g one thousand days wa gyud kay mahimo. Step- by step lang, ginagmay, pero ang tumong is hopefully sa iyang giingon in three years’ time sa iyang term na makab-ot gyud nato,” dugang niya.
Sugyot sa pipila ka mga labaw sa departamento nga kinahanglan ipatuman sa dakbayan ang disiplina sa mga tawo.
Pulong sa kapikas ni Mayor Rama nga si Malou, matuman ang gidamgo nga masusama sa Singapore ang dakbayan kung magsugod kita sa pagdisiplina sulod sa atong tagsa-tagsa ka panimalay.
“Kung dili nato mo-implement og rules sa bata dili pud na i-follow sa mga bata ug sa mga tawo nga nakita sa atong palibot. Like kung dili ta mo-istrikto sa pag-segregate sa basura, magpataka lang gyud na sila’g labay,” ingon niya.
“Kung ato na i-implement sa atong balay or sa atong barangay, mao sad nay sundon sa uban. Inspiration ta sa ubang tawo ba, naay makakita nato sa atong balay ma-inspired mo,” dugang niya.
Gihimong sanglitanan ni Malou ang ilang pinuy-anan, nga kung bisan anaa kini daplin sa sapa lahi ka og bati-on ay ila man gipangbutangan og mga tanom.
“There’s happiness in the house and then naay love. Kay kun magpuyo ka sa usa ka balay ‘nya wa kay love, happiness and peace, di gyud na nimo ma achieve ang imong balay nga Singapore-Like Cebu City,” pulong ni Malou. #
Cebu City • News & Information 