CEBU CITY (Jan. 21, 2022) –– Imbis nga maghuwat sa mga tawo nga moadto sa vaccination sites, ang Dakbayan sa Sugbo maoy moadto sa mga sitio aron mamakuna.

Kabahin kini sa katuyoan sa dakbayan nga makab-ot ang gitinguha nga “herd immunity” sa mga lumolupyo sa dakbayan.

Ang pagpamakuna batok CoViD dad-on na sa Dakbayan sa Sugbo ngadto sa tanang mga sityo sa dakbayan. (PIO/File)

Ang “herd immunity” nagpasabot nga igo na ang gidaghanon sa mga nabakunahan batok sa CoViD maong dili na makapanakod ang usa ka tawo nga may kagaw niini kay ang naa sa iyang palibot may panalipod na.

Aron kini makab-ot, nipasalig ang mga Mayor’s Information and Liaison Office (Milo) focals nga motabang sila sa “purok system vaccionation” nga programa sa pangagamhanan sa Dakbayan sa Sugbo.

Atol sa ilang pakigtagbo kang Dante “Dax” Arcilla Jr., ang pangulo sa Division for the Welfare of the Urban Poor (DWUP), karong adlawa, ilang gipadayag ang ilang kaikag nga motabang.

Si Arcilla, nga maoy gitahasan ni Mayor Mike Rama sa pagpatuman sa “community-based vaccination” sa dakbayan, niingon nga nagpatabang sila sa mga MILO focals aron mas mapadali ang pagpahigayon sa pagbakuna sa mga sitio.

“They know the people,they know the place, so they would be of great help especially karon nga we are racing against increasingly virulent (CoViD) variants.  We have to move faster and we have to move together,” siya nagkanayon.

(Nakaila sila sa mga tawo, suhito sila sa dapit, maong dako kaayo silang tabang ilabi na karon nga nakiglumba kita batok sa nagkaisog nga klase sa CoViD. Kinahanglang mas paspas kita molihok ug kinahanglang usa kita sa paglihok.)

They know the people,they know the place, so they would be of great help especially karon nga we are racing against increasingly virulent (CoViD) variants.  We have to move faster and we have to move together.

Dante “Dax” Arcilla Jr., sa iyang pagpatabang sa MILO alang sa pagpamakuna sa ka-sityohan

Ang dakbayan sa Sugbo adunay 1,389 ka mga sitio.

Sigon ni Arcilla, ilang tuyo nga nga makabisita og 150 ka mga sitio matag adlaw aron mahingpit ang programa sa dili pa moabot ang buwan sa Mayo.

Kay aron makab-ot ang herd immunity taliwala sa kapin usa ka milyon na mga lumolupyo sa dakbayan, kinahanglang mabakunahan ang 719,000 ka mga tawo.

Sumala sa datos, anaa na sa 550,790 ka mga lumolupyo dinhi sa dakbayan ang nakakumpleto na sa bakuna samtang 658,832 na ang nakahuman sa first dose.  

Dugang ni Arcilla, gisugdan nila ang pagpamakuna sa mga sitio niadtong niaging semana. (PIO/NJY)